鄭丹瑞（阿旦）身兼多職，除咗係電台DJ、電影製作人仲係主持等等，真係數都數唔晒！
即將喺11月27日踏入62歲生日嘅佢，就獲一班演藝班學員為佢預祝生日，而佢哋仲係阿旦5年前所教嘅學生，隔咗咁多年都冇忘記呢位恩師，果然「一日為師終身為父」呀！
阿旦喺Instagram上載照片，畀包後生仔女包嘅佢笑得勁開心，啲乖女仲向阿爸送飛吻，真係睇見都冧呀！
相中見到已經做咗演員嘅何廣沛、吳沚默、陳潔玲、利穎怡、譚永浩，仲有《東張西望》「咪神」主持林泳淘、李旻芳同埋男友黃耀英等等，相信阿旦見到一班學生青出於藍都好有成功感。
佢留言：「我教嘅第一屆藝員訓練班，D26K，咁就五年了，亦算係一場緣份，多謝你哋咁長情。」
網民都大讚阿旦Keep得好好，點睇都唔似已經登六，仲祝佢生日快樂同身體健康呀！
(on.cc 東網)
