藝人鄭嘉穎、電影監製黃百鳴、導演林德祿等到銅鑼灣出席新片煞科宴，嘉穎被問到會否向電影公司推薦女友陳凱琳，將來以情侶檔拍電影。
他說：「佢之前都拍咗套電影，其實佢又拍電視，又拍電影，又出席活動，都好多嘢做㗎，有麝自然香，唔使我講嘅！（無綫推『限奶令』，你女友受惠，你最開心？）點解咁講呢？我都係觀眾嚟㗎！我諗電視台有本身嘅政策，我明白合家歡時段嘅需要，我對呢樣嘢冇特別感覺，希望唔似黃秋生咁講，唔好港姐着潛水衣啦，我好期待睇吓出年港姐係點！」
嘉穎又對女友早前被市民投訴搭飛機登機時插隊，有恃藝人身份使用特權之嫌，他為女友平反，他說：「我都知發生咩事，聽佢講過，單嘢好笑，我諗要分清楚特權同消費者權利，你買咩飛就有咩權益，你買咩飛就有咩服務，呢個係航空公司嘅決定，搞清楚件事先投訴！（戥女友無辜？）藝人係要經歷呢啲嘢，呢次算係雞毛蒜皮，以後再有大嘅，佢都可以經一事長一智！」
(on.cc東網)
