杜如風同黃又南嘅緋聞已經傳咗好多年，早前更因為一張相而畀網民追問係咪終於都肯公開戀情，之但係之後黃又南就被影到與珠寶商千金兼珠寶設計師莊沙娜（Sarah）蜜遊銅鑼灣。
黃又南其後接受電台訪問，講到與Sarah蜜遊銅鑼灣，他否認拍拖：「大家係好朋友，普通男女食飯，明白作為公眾人物同女仔食飯就會寫拍拖。」他亦謂兩人認識了幾年，上月與團隊一起去日本睇介紹陀飛輪及珠寶展，而適逢他生日，大家都有一起食飯。
他亦謂現時是單身，問到Sarah可是單身？他謂：「佢都係，但我暫時冇諗（拍拖），搞咗演唱會先，事後先算，隨緣。（但你係open？）open嘅。」
又南謂明年三月Shine將在紅館舉行15周年演唱會，現已準備中，腳及盆骨有傷患的他表示：「依家好番好多，我哋提早半年開始綵排跳舞，我都停咗內地工作唔接。（演唱會將騷肌？）我早兩個星期開始操，依家係理想嘅，5年前我哋有騷肌，當時我哋開三面台，但開完騷落台我同天佑（徐天佑）都攰到出唔到聲，所以今次四面台更加要提早練，因為會仲攰。」
問到是否演唱會完結後才會諗拍拖？他笑言：「演唱會之後我同天佑仲會去拍戲，所以隨緣啦，但緣分要嚟嗰時擋都擋唔住。」
(on.cc東網)
