鄭希怡（Yumiko）、黃依汶（Emme）、黎諾懿、攝影大師水禾田今日到尖沙嘴海港城，出席服裝品牌7 For All Mankind支持慈善活動。唔使問，兩位靚媽一碰頭，就講湊仔，Emme仲爆Yumiko冇本身好耐性，成為人母後有進步，又互相對襯家，黎諾懿都加入叫Yumiko可以考慮下佢個仔「小春雞」。
Yumiko同Emme話，佢哋兩個小朋友依家——即係梁浸浸同陳真都一齊返學前班，希望第日一齊讀書，有個照應。Yumiko會喺屋企教女唱歌跳舞，Emme就好多時會睇書學湊仔，發掘囝囝天份，佢話：「阿仔依家一歲八個月大，爸爸都開始傳授功夫潛質俾佢，近日玩雙節棍，可以表演下俾親朋戚友睇都幾好，又可以對住梁浸浸自衛，因為梁浸浸成日從後好大力箍陳真頸，有次仲試過刮損陳真塊面，爸爸夜晚同我講好肉赤，要教陳真功夫先得。」梁浸浸活躍又肉緊，令Emme又愛又恨。
(蘋果日報)
