啱啱過咗40歲生日嘅黃曉明，連日嚟喺微博貼咗唔少慶祝生日相，日前老婆Angelababy仲貼咗張頭貼頭嘅相晒恩愛！不過黃曉明點都估唔到，今年生日竟然收咗一份厚禮！
喺今年1月，Angelababy為黃曉明生咗囝囝小海綿，數吓手指o依家已經有10個月大，佢哋兩公婆一直都唔俾個仔曝光，只係試過喺小海綿3個月嘅時候，Baby抱住阿囝為《奔跑吧》（原名《奔跑吧兄弟》）新一季錄咗一條問候拍擋嘅短片，不過嗰陣只係見到阿囝嘅側臉，搞到大家都好心急想知道阿仔個樣！
今日有周刊報道，Baby喺上個月喺保母嘅陪同下，抱住阿仔返香港，雖然Baby打扮撲素兼戴晒口罩，點知都俾人認到，已經10個月大嘅小海綿，份量十足，全身都圓碌碌，真係見到都想錫佢幾啖，報道仲話小海綿個樣同爹哋一個餅印。
Baby本來警戒性好高，行到人多嘅地方，都盡量撳實阿仔個頭，但係小海綿反抗，最終棋差一著，阿囝嘅正面相首度曝光。一向好脾氣黃曉明，下晝喺微博狂轟，「都說我是好脾氣，那是因為你傷害我可以，沒有傷害到我的家人，我怎麼都可以忍，但是從現在開始有人需要我保護了，如果涉及到家人孩子！那是我的底線，對不起！我跟你死磕到底！再能忍的人也有爆發的時候！」
不過隔咗一陣，黃曉明刪除文章。點知到傍晚時份，黃曉明又喺微博留言，佢話：「中午太衝動了，說話有點沖，冷靜下來理了一下，覺得有些話還是要說，所以我再說一遍。我知道，作為一個公眾人物，私人空間是個不太能強求的事情。可我還是希望，能給我們的孩子一個普通的，不被過度關注的成長空間。他不是公眾人物，還不到一歲，或許他長大後會自己想走到大家面前，可是不是現在。」
佢又話：「未來媒體或路人也許還會拍到他，但懇請和希望不要曝光或勞煩幾秒遮下臉。這是作為一個父親的請求，謝謝大家。」
（蘋果日報）
