靚靚袁詠儀喺06年生咗「魔童」之後，大部分時間都喺湊住阿仔，對於教育之道靚靚不時都會同大家分享，佢接受訪問時自爆阿仔6個月大開始已經開始學英文、國語，又要上興趣班同playgrounp。
不過喺教育上最大問題竟然係Chilam，靚靚曾經出席活動時講過，自己太嚴而老公就主張乜都要試，佢仲舉例話試過有次靚靚講明下晝開始唔可以食糖，不過Chilam唔夠兩個鐘就拎包糖畀阿仔。喺早前靚靚一家去到英國旅行，期間Chilam喺餐廳同阿仔玩live，而靚靚就黑面叫阿仔講中文，之後佢就出席活動解釋，原來魔童讀國際學校中文唔好，想阿仔講多啲中文，而Chilam就縱容阿仔講英文，靚靚仲話當時想劈開Chilam咁話。
雖然同老公喺教育上有矛盾，不過亦多得有Chilam點醒，靚靚曾經喺訪問中自認「怪獸家長」，安排阿仔入名校，Chilam一句「係整定嘅」令靚靚醒覺。魔童越嚟越大，今年已經11歲，靚靚早前出席活動仲透露已經教定阿仔「分手」，靚靚早前發現阿仔唔開心，原來有位女同學要離開香港返美國，靚靚話：「一定係對個女仔有好感先會有呢個感覺，我同阿仔講要習慣男女之間離合，有啲女仔會無端端同你講分手，你要懂得面對，唔好太認真。」
靚靚仲教魔童拍拖之道：「遇着你好鍾意女仔，無論乜事都say sorry，唔鍾意就直接講，唔好拖。」
(蘋果日報)
