近日從加拿大回港出活動賺奶粉錢的鍾嘉欣（Linda），日前單拖現身中環街頭，打算搭的士走人嘅佢，遇上繁忙時間，等咗好耐都截唔到車。
Linda心急返屋企湊女，竟隔着馬路「唱山歌」咁大叫記者幫手搵的士，響亮「歌聲」引起途人注目！
藝人鍾嘉欣前年年底下嫁脊醫梁乃鵬姪兒Jeremy後，嫁雞隨雞的她去年8月在加拿大誕下囡囡Kelly，之後一直專心相夫教女，間中會由加拿大返港出席活動吸金。
近日Linda又回港出席活動搵奶粉錢，日前下午5點幾，只見佢獨自前往中環行街，佢紮住兩條孖辮仔、着住灰色外套，孭住黑色大袋，步伐急速，不停喺附近蕩來蕩去，期間又不時笑咪咪傾電話。
原來Linda打算截的士返將軍澳，奈何遇上繁忙下班時間，結果行咗好耐都截唔到車，後來佢發現記者喺遠處，隨即隔着馬路如「唱山歌」般大叫記者幫手：「可唔可以幫我截架的士呀？」
嘉欣響亮嘅叫聲隨即引來唔少途人注目，期間更有兩名女粉絲被Linda嘅聲線吸引，上前要求同佢合照，Linda雖然趕時間亦有求必應，態度親切。
其後記者回應她，該時段很難截車，心急見囡囡的Linda最後放棄搭的士，並說：「我好想快啲返屋企見囡囡呀！（Call車嘛！）Call咗冇車呀，我行咗好耐都搵唔到的士，咁我去搭港鐵會唔會快啲呢？」
Linda說完即跟記者道別，然後急急腳步往附近港鐵站，轉搭港鐵返歸。
(on.cc東網)
