陳嘉倩被爆與金毛凸腩男友陳志遠拍拖，男方即被起底，指曾戀無綫新晉小花朱婉禎及前有線球彩台前主播、現任馬評人及六合彩主持嘅陳思琦(Rita)。
陳思琦喺2013年被指遭前男友陳志遠上門禁錮12小時，兼持刀要脅同歸於盡，判被告入獄兩年四個月。
今日接受電話訪問，佢否認係陳志遠嘅前女友，稱當時兩人只涉金錢糾紛。陳思琦當年受盡驚嚇，常發噩夢，但現在已事過境遷，因為Rita已準備喺今個月與圈外男友拉埋天窗。
Rita早前喺fb貼上一張黑白色嘅婚紗照，笑容燦爛，留言﹕「I was attired in white.(我穿着白色)。」但就未見未婚夫個樣。
Rita好保護未婚夫，只肯透露對方姓周，佢話﹕「佢係自己開律師樓，唔想太高調。(咁求婚過程浪唔浪漫？)佢係外地求婚，都幾sweet嘅。(有冇送花、鑽戒同跪地？)有有，一定有，呢啲基本動作啦。(婚後係咪不設房？)生小朋友隨緣啦，如果有就係天賜嘅禮物。」問到會否叠埋心水做少奶奶？佢笑笑口話﹕「暫時唔會啦，我工作都比較自由，唔做嘅好悶架，總之希望大家都幸福啦。」
(蘋果日報)
