袁偉豪同黃翠如今日喺銅鑼灣皇室堡出席「夢幻雪國揭幕禮」，除咗同Fans玩遊戲外，袁偉豪仲獻唱周柏豪嘅歌《天網》，原來佢同柏豪嘅聲線有幾分相似，佢話：「可能同柏豪發聲位類似，今日冇綵排，所以有啲緊張。」
患上感冒嘅翠如，表示係被一位馬來西亞朋友傳染：「好怕再失聲，其實本身冇事，噚日同三哥（苗僑偉）食飯，見佢哋食蟹，我又忍唔住，一食完就係咁咳。」翠如仲話未睇醫生，唔怕男友蕭正楠擔心？佢笑住話：「佢慣咗我病。」下月就聖誕節，翠如透露間斷都有工作，男友蕭正楠亦要工作，所以佢打算相約女性朋友到一個熱嘅地方探望其助養嘅小朋友。
袁偉豪就同女友張寶兒過第一年聖誕節，問到有冇安排慶祝？佢話：「暫時未知，要睇工作安排先，我都希望可以抽番一日半日同寶兒、家人慶祝，不過係家人還家人，拍拖還拍拖，未融入家中，我都想過二人世界。」送咩禮物畀寶兒？袁偉豪話：「送我個人，我會著聖誕老人衫，角色扮演，都係貪玩啦！」
(蘋果日報)
