《爸爸去哪兒》至今已經去到第五季，一班星級爸爸同自己仔女嘅相處方式引起咗唔少網民嘅熱烈討論。
有「汶萊王子」之稱嘅吳尊同杜江就齊齊去咗內地嘅綜藝節目《快樂大本營》大玩遊戲，而且仲互相扮演對方嘅仔女，一班網民睇完都話吳尊果然係偏心囡囡NeiNei，仲笑言Max大個睇番應該會好傷心。
難得兩個星級爸爸一齊上節目，作為主持人嘅何炅當然要吳尊同杜江即席表演同仔女相處嘅情景，何炅仲指明要睇吳尊氹仔女食雞蛋嗰一幕，杜江仲即時毛遂自薦要扮Max添！
而吳尊當正杜江係Max，仲超認真咁對佢講：「怎麼都不吃雞蛋呀？你是男生，要吃雞蛋才會有肌肉，不然怎麼照顧姐姐？」而扮Max嘅杜江為咗唔食雞蛋，即時對住吳尊講：「爸爸，我不是男生。」吳尊聽到之後眼都凸埋，仲話：「我白生你啦！不吃雞蛋，我就不陪你睡啦！」
不過對住扮演NeiNei嘅女主持人吳昕，吳尊嘅態度即時勁溫柔，仲話：「你不吃雞蛋我都陪你睡。」
一班網民都忍唔住幫Max講咗句：「公平咩？」
(on.cc 東網)
