陸永當年同老婆Rainah拍拖半年左右就結婚，但係結婚前後都一樣恩愛，仲生咗2個好可愛嘅囡囡！
今日「1111」雖然係光棍節，但同時係佢哋拍拖7周年嘅大日子，兩公婆都喺網上隔空互相多謝大家，閃到呢！
喺呢個紀念日，陸太都特別感觸，喺Instagram上載兩人合照，留言表示「拍拖7年結婚6年，你係我生命中最好嘅事！」
陸永都喺IG感激老婆，為佢走勻全港搵開聲茶，令佢都忍唔住嗌「love u陸太」。
「老實講，你地喺演唱會聽到我把聲都要多謝佢，開show前三日我把聲沙晒，佢走勻港九新界，幫我搵開聲茶，沖養聲水，發護聲膠，我先至捱到今日，聽晚演唱會倘若你見到佢，同佢講聲唔該，聽晚我地就喺演唱會渡過我地嘅拍拖紀念日，I love u陸太。」
網民都率先留言話「多謝陸太」、「好甜蜜」，雖然紀念日要喺麥花臣場館過，但相信陸太對於今晚嘅「禮物」一定好冧啦！
(on.cc 東網)
