鄭嘉穎今日喺W酒店為新錶發佈會擔任模特兒，本身都有儲錶習慣，佢覺得男士喺唔同場合配戴唔同款式手錶，係展示品味方法，至今已經收藏有廿多隻手錶，而最貴一隻價值六位數。
之前陳凱琳講過話會同鄭嘉穎去旅行，點知依家得番女方一個人同朋友去。有讀者報料話Grace喺ig透露過想要過新生活，又指最近好少見到佢哋一齊，仲連少咗去嘉穎大坑寓所都知。該讀者稱，即使嘉穎人在香港，同朋友聚會之後，陳凱琳都係直接返屋企，咦……唔通？
今日問番嘉穎發生咩事啦，佢話今次同唔到女友去旅行，係因為要忙埋台慶先，但唔肯講計劃去邊。兩人未成行，陳凱琳就率先去咗日本大阪，呢兩日都有喺Ig post相。日前陳凱琳喺Ig story爆咗句「我有未婚夫！」問番嘉穎，佢笑言：「係咪我？佢講吓笑啫，希望佢係講笑，因為未婚夫唔係我，都未求婚，係男女朋友關係。」
佢指若果有再下一步，係唔需要訂婚，應該係直接結婚，但暫時未有消息，嘉穎仲話：「到有消息會通知大家。」問佢係咪聽到女友叫老公會更開心，嘉穎話：「只係一個法律儀式，唔表示兩個人嘅關係，結咗婚都可以離婚。」講到同女友關係係咪已經超越一段婚姻，佢笑住：「好好，多謝關心。」晚上，陳凱琳回應傳媒時就稱：「哈哈，嗰陣我喺度講笑，佢都幾有幽默感呀！」
(蘋果日報)
