藝人林盛斌（Bob）向來係愛妻號，仲不時為太太Pearl送上驚喜，今年母親節嘅時候，Bob就同三個女夾埋拍片兼送咗對波鞋畀Pearl！
呢日Bob又再「重施故技」，同三個囡囡夾埋送生日禮物畀老婆，睇片見到Bob做指揮，指使三個女由屋企玄關位跑入大廳，當時Pearl抱住囝囝林道申（Jaye），見到三個女衝埋嚟都表現冷靜，然後三個女拆禮物，原來Bob送咗部最新型號嘅智能手機畀老婆呀！不過Pearl收到禮物嘅時候都係好冷靜，係咁意「嘩」咗幾聲，搞到連Bob都話：「好似完全冇咩反應咁樣嘅！」雖然Pearl似乎對部電話冇乜大興趣，但佢就逐一錫錫做跑腿嘅囡囡！網民都為Bob嫂講說話，話佢要照顧四個小朋友好攰，所以反應比較慢啲啫！
(東方日報 / instagram)
