郭富城主演嘅電影《破‧局》今晚喺圓方舉行好友場，主角城城當然有現身，佢老婆方媛（Moka）喺老公做訪問期間，靜悄悄同媽媽前後腳入場，不過佢嘅芳蹤逃唔過記者法眼，行蹤曝光後，Moka都有應記者要求停低影相。
城城早排一索得女Chant，咁佢個舊愛熊黛林（Lynn）啱啱宣佈有喜，問城城知唔知？佢話：「如果大家有追蹤我嘅近況，都知道我忙緊拍戲，而我冇乜留意同關注娛樂新聞，對於我嚟講，我哋做娛樂圈呢一行，對於有圈內朋友有好消息，我哋都會祝福。」
好喇，唔講舊愛，咁講新戲啦，城城話多謝導演連奕琦同王千源，因為今次同一啲英國攝影師合作，自己都大開眼界，喺片中要演倒霉警察，係一個黑色幽默嘅故事，有別於自己以往演出嘅角色。近況呢，城城就忙緊拍由翁子江執導嘅電影《全球通緝令》，就同梁朝偉合作，城城話：「第一次同偉仔合作，好欣賞對方，自己去到唔同影展，人哋問我想同邊個合作，我都會話想同發哥同偉仔合作，咁發哥就合作過，今次就到偉仔。」
城城又話：「對手對自己嚟講都有唔同嘅挑戰，偉仔係自己好欣賞嘅演員，又好有魅力，亦都俾到好多衝擊自己，偉仔係一個好開心好認真嘅演員，大家私底下都有傾偈，似啲做運動嘅嘢，大家以為偉仔平時係一個好沉默嘅人，但其實佢都好鍾意傾大家有共同話題嘅嘢。」
(蘋果日報)
