周潤發有民間特首之稱，可想而知佢係好受市民喜歡，連網民都特登喺Facebook幫佢開咗個名為捕獲野生發哥嘅群組，俾大家上載同發哥嘅合照。每個接觸過發哥嘅fans都對佢讚口不絕，話佢作為巨星都冇架子，好鬼nice，講嘢又風趣抵死。
問下發嫂喺佢眼中嘅發哥，私底下又係點呢？同市民睇到嘅發哥係咪一樣？發嫂話：「基本上都唔係有好大分別，係好愛錫老婆、家人，包括我家、佢個家， 呢一個絕對冇得否應啦！到今時今日都係靚仔，永遠都係靚仔。」
仲話發哥個人好細心：「佢知我鍾意食蟹，佢就自己去街市買咗兩隻蟹畀我，蒸埋喎！咁咪就畀我驚喜囉！佢間唔中都會畀我驚喜嘅！」嘩！讚到咁厲害，問發嫂老公有乜缺點？佢諗咗一下笑話：「好性急囉！話做就要做。佢係急到 例如約咗人7點食飯，佢6點半未夠已經stand by，著好鞋，將部車開喺門口，俾你知道我已經準備好，你哋出得門口未。不過當時成班朋友都望住佢，問佢駛乜咁早出發，佢就係驚死會遲到嘅人。」
發嫂仲爆料喺屋企嘅發哥，其實好靜，話不多講。佢最怕同老公一齊喺廚房煮飯仔，發嫂話：「我兩個一定唔可以一齊落廚，佢入廚房我就癲咁樣，因佢廚飯周圍好亂架！我就唔得咁樣，我一路煮一路執嘢同洗嘢！平時我都鍾意落廚，煮新加坡餸最多，好似咖喱魚頭、咖喱雞、海南雞飯同肉骨茶都識整，老公都好鍾意食，佢講過全世界嘅咖喱係我煮得最好食、最啱佢胃口。」
成間屋咁大，得佢地兩公婆住，咁發哥唔多講嘢，咁發嫂咪好悶？佢話：「我唔會悶喎，因為有好多嘢搞，一方面要搞佢啲合約，二方面要做自己嘅投資，仲有打理間屋，真係好鬼忙，反而老公我就希望佢專注做演員，其他嘢唔使佢煩，有事我就來頂，等佢可以得閒去影吓相、行山同跑步放鬆下，做佢想做嘅嘢，演員係咁先健康。」
(蘋果日報)
