藝人林盛斌（Bob）今年追仔成功，老婆Pearl（Bob嫂）8月時為佢誕下囝囝Jaye（林道申），而三個囡囡就榮升家姐，不過相信各位父母都有相似經歷，就係擔心細嘅出世，大嘅會覺得媽咪「被分薄」，所以會呷醋！呢日Bob嫂就喺Instagram發長文，話三個女「行為倒退」，上至9歲大女到3歲細女都有反常行為，而今次就係細女喺Bob嫂餵緊奶時扭要陪佢瞓覺豬：「我請佢在旁邊等一等，我餵完奶十分願意陪佢！」於是阿女就喺旁邊扮出一副可愛瞓覺樣！
情緒暴發不能處理
佢話：「大嘅自然感覺被忽略，然後出現各種行為嘅反常，例如本來可以自行如厠（廁）卻突然話唔識、或是本來可以自行食完一整碗飯，現在卻一啖都要人餵、另外仲有最重要嘅情緒起伏不定。呢啲行為（我）統稱為行為倒退，至於點算（解）唔索性叫妒忌呢？因為大嘅平常時候分明十分愛錫細嘅，每日都要錫錫，只係當大嘅感到明顯嘅忽略，行為就會突然倒退，有時加上情緒嘅暴發，而且完全不能處理。」
多關注三個女
不過Bob嫂就自言其實除咗處理細仔食奶同沖涼，其他都交畀家傭，一心都專注喺三位公主上，但係似乎不似預期，佢話：「每日家姐們嘅各種情緒暴發卻令我每日好似地幔裹面嘅岩漿–不能自制嘅滾熱流動，但願這場不能避免的風暴可以慢慢變得溫和且日漸散去。」
(東方日報)
