「四洲太子女」戴凱欣今晚與34歲大陸從事金融投資嘅樊林爽在灣仔君悅酒店補搞結婚酒會，宴請約800位賓客。
傍晚約5時，千億新娘身穿低V紫色晚禮服拖老公現身，手上戴齊紫藍色結婚戒指同2.17卡求婚鑽戒，而閃爆嘅鑽石頸鏈、鑽石耳環就係媽咪送畀囡囡嘅嫁妝，一對新人應傳媒要求連嘴兩次。
戴凱欣表示：「香港婚禮籌備咗半年，之前上海婚禮主要係朋友出席，今日係父母長輩嘅朋友。」問到心情？上海姑爺用半鹹淡廣東話：「好開心。」有冇接新娘儀式？戴凱欣話：「其實喺香港7月時已經做咗，今日補擺喜酒，所以輕鬆啲。」幾時生小朋友？戴凱欣坦言：「都想明年，明年年頭去度蜜月，但度蜜月唔一定要造人，婚後會香港、上海兩邊走。自己都好習慣婚姻生活，同老公都係咁sweet，反而唔慣嫁咗出去嘅感覺，因為唔捨得，日日同屋企人通電話。」
問樊林爽記唔記得接新娘時愛的宣言？戴凱欣代答：「姊妹要佢用廣東話讀愛的宣言，佢歪歪哋音，好搞笑，佢讀到八成，自己都要學上海話，但真係好難學，好佩服老公，廣東話咁難學都講到。」問到最流利嘅廣東話係邊句？樊林爽即望着老婆：「我愛你。」
(蘋果日報)
