黃翠如今年已經36歲，已屆適婚年齡，早前就有傳二人會喺明年結婚，曹永廉又爆其實佢哋已經結咗婚。但傳聞歸傳聞，蕭正楠同黃翠如均極力否認，連身邊朋友唐詩詠、陸永等都叫大家唔好迫佢哋，要俾啲時間。
好明顯，蕭正楠已完全ready，只係欠翠如點頭。今日有周刊報道指翠如已開綠燈，直認已認定蕭正楠係終身伴侶，隨時嫁得，只係欠缺一點勇氣。翠如話見盡好多身邊朋友離婚，仲留意埋統計數字，話全香港離婚率達百分之四十，係咪真係咁高就唔知，但就搞到翠如對婚姻失去信心。
不過，蕭正楠都好努力俾信心女友，早前趁翠如36歲生日，係網上冧爆留咗四個字「天下無雙」，翠如又點會唔感動吖。翠如都直認男友好遷就自己，知道蕭正楠係會因為佢開心而開心，佢唔開心而唔開心，但佢就未到呢個境界，睇落似乎係男嘅愛女嘅多啲，咁就應該嫁得過啦。
對於網民喪插翠如喺《使徒行者2》演技差，佢就自爆當初面試時，就叫監製同導演，「覺得我唔夠好就唔好揀我」，最後翠如仍是脫穎而出，佢話可能係喊戲幫咗佢好多，因為本身都好鍾意喊。但對於網民嘅批評，佢會努力改善，已找老師教戲，希望將來可以見到翠如嘅進步。
