恭喜恭喜！恭喜Lynn熊黛林，終於中頭獎！
頭獎就係——造人成功喇！《蘋果》消息指Lynn有咗三個月！Lynn喺去年10月同郭可盈胞弟、家族坐擁百億資產嘅郭可頌結婚，更揚言雞年會努力造人。Lynn婚後明顯減少工作，專心調理身體，今年2月，有網民曾經影到Lynn去上環，有「婦科聖手」之稱嘅中醫劉逢吉睇醫調理身體，直到最近終於有好消息。
前日中午二點幾，Lynn一個人現身太古城誠品，見Lynn腳踏平低波鞋，穿上黑色衫同黑色裙，腹部微微隆起。見Lynn專攻育嬰書，由於佢生得高，而書本位置較低，但佢似乎唔敢動作太大，只係好小心咁半蹲式咁望一望下層嘅書，但好快就企番起身。Lynn喺書店內逗留約半小時，之後再逛其他商店，見佢步履輕鬆，逛咗一陣就走人。
上星期，Lynn更慶祝同老公結婚一周年大日子，兩公婆用繩互綁對方作狀咀嘴，Lynn留言：「就這樣把你牢牢地綁在我身邊，一周年快樂。」
相信兩口子好快就會有「我們仨」嘅幸福家庭照，繼續放閃。
(蘋果日報)
