農夫成員陸永與老婆Reina喺2011年奉子成婚，幾個月前Reina發聲明同親父劃清界線，陸永爆岳父欠落周身債，連累老婆被收數佬長期滋擾，目前主力照顧囡囡陸一穎(Hannah)同陸一心(Simsim)，不時都有貼下囡囡嘅生活照上網，點知噚日出咗一個post講Simsim對人用「靚」同「得意」嘅反應，就惹嚟網民批評，認為Simsim係「玻璃心」。
「陸永嫂」Reina今日喺Ig貼出文，留言話點解一個四歲小朋友接受唔到人哋話佢得意，係咪一定要讚佢靚，佢先叫叻，Reina今日問Simsim，點解唔鐘意媽咪用「得意」嚟讚佢，Simsim嘅答案係「因為『得意』係細個，『靚』係大個，佢想做大人」。
Reina認為一個四歲小朋友思想唔會好似部分網民咁，諗嘢咁複雜，唔會覺得人哋讚佢得意等於唔靚，「而我讚自己個女得意，因為我真係覺得佢好得意，我口中嘅『得意』並冇包含『唔靚』在內，我都唔覺得一個唔靚嘅人，係一定會得意囉」。
佢又指有網民成日話「陸永嫂」Reina讚女Hannah靚，Simsim唔靚，又話Simsim會唔開心云云，咁Reina都有將自己Ig啲所有post重新睇一次，自問從來好少將兩姊妹拎嚟比較，只係喺幾個post中，有講過兩個女，兩款性格，兩個都係獨一無二。只係有啲人留言問Hannah靚啲定Simsim靚啲。
Reina打個譬如喺Hannah眼中，爸爸係最靚仔，反而阿妹Simsim真心覺得爸爸唔靚仔，Hannah以前試過為咗呢件事喊住鬧Simsim，當時Reina都即刻同佢哋兩姊妹講，「個個人睇嘅嘢都唔一樣，個個人用自己對眼睛去睇嘢，企嘅位置唔一樣，睇嘅嘢唔一樣，覺得『靚』同『唔靚』都冇分『啱』或者『唔啱』」，Reina就話「你哋兩個都係我個女，我都覺得你兩個係最靚女嘅，但總會有人覺得你哋唔靚，如果第時有人話你哋唔靚，你哋都唔使唔開心，因為『靚』唔係最重要」。
「陸永嫂」Reina今日都有再問Simsim，如果媽咪o依家話「你唔靚你會唔會唔開心」，Simsim就答「唔會！咁我要乖啲我就會靚啲囉⋯我都係唔使咁靚啦」。唔少媽咪級嘅網民都覺得「陸永嫂」Reina講得冇錯，每個小朋友都係獨一無二，另有網民笑言Simsim話乖啲就靚啲，咁佢話唔使咁靚，係咪即係佢唔想乖。話晒童言無忌，估計Simsim都係想將自己感受講出嚟。
(蘋果日報)
