【玩到癲晒】陳瀅爆好姊妹年尾結婚!?

    王敏奕、陳瀅、陳嘉寶(Anjaylia)、陳凱琳、倪晨曦、鍾浠文、李靜儀等今日喺旺角出席「Shu uemura 2017發佈會」,講到Anjaylia噚晚同王敏奕、陳瀅等一班姊妹齊齊開party,佢哋表示玩得好開心,玩到癲晒,美中不足係陳凱琳有工作而嚟唔到。

    陳瀅好開心咁話:「好多嘢慶祝,我過咗生日,王敏奕年…尾結婚,係生日、生日、生日,我講錯咗,係Anjaylia結婚,王敏奕1月1日生日,唔好意思,我講錯,我未瞓醒。」講錯嘢嘅陳瀅即刻掩嘴,王敏奕就一臉茫然咁笑住望住陳瀅。

    對於早前有報道指黃宗澤(Bosco)追王敏奕,令到王敏奕同男友曾國祥感情亮紅燈,佢即刻話:「唔使解釋,我覺得冇人會信,當晚陳瀅、糖妹都有去呢個《飛虎極戰》嘅煞科宴,我哋去Bosco間餐廳食飯,我哋冇飲到好醉,好開心嘅,完咗之後就搭車返屋企。」

    Anjaylia力撐王敏奕同曾國祥好sweet,有冇結婚嘅準備?王敏奕表示想拍多啲戲先。至於佢同曾國祥嘅感情?王敏奕話:「非常之好,羡煞旁人。」講到佢哋會做Anjaylia婚宴嘅姊妹團,問佢哋會唔會搶花球,陳瀅笑住話:「我未ready結婚,連男朋友都未有。」

    Anjaylia好搞笑咁話:「當晚會有兄弟放題。」穿上低胸露背嘅陳凱琳,佢透露已做足安全措施,唔會走光,除非有怪風啫!提到佢亦係Anjaylia婚禮姊妹團之一,陳凱琳話:「人生第一次做姊妹,我有成日問Anjaylia有咩要幫手,點知佢自己都處理晒,之前我哋開party玩美少女戰士,我哋有keep住啲衫,到時用嚟玩新郎。」佢仲話乘機會取下經,為自己將來結婚做準備。

    (蘋果日報)

    SHARE