開估未﹖
賴慰玲今年7月宣佈陀B 5個月，並喺上月同舞台劇工作者男友梁子峰低調簽紙註冊，佢班好姊妹——劇集《女人俱樂部》（M Club）班演員當然有份去見證。
眨吓眼，賴慰玲已經陀B 8個月，原來佢哋約埋去主題樂園酒店開P，但呢個P主題勁多，好似係賴慰玲嘅baby shower、賀陳嘉寶（Anjaylia）下月結婚，仲有黃山怡（糖妹）、陳瀅及其好姊妹何雁詩嘅生日咁，總之一個party，幾個主題。適逢萬聖節，成班女戴晒啲應節主題頭飾同面具等，玩到好開心咁！仲有啲人拎住同自己有關嘅標語，嘟晒嘴影相，要幾sweet有幾sweet咁。就連何雁詩都留言話：「唔知20年後我哋睇番啲相會唔會覺得我哋想當年好kai呢？」嗯……至少家陣你哋好開心，先係最重要！
(蘋果日報)
