#發嫂：加埋我又整咗個BB房，返嚟日日睇到都 (想喊) 都有眼淚。。。
1991年，發嫂陳薈蓮懷孕九個月，最後胎死腹中。曾笑言想生四個小朋友的發哥，夫婦倆至今膝下猶虛。
七年，發嫂用了七年時間，才能平撫喪女之痛。但她說，之後沒再刻意「造人」，與陰影無關，只是經歷了那件事情之後，發哥一直忙忙忙忙，她淡然謂：「周潤發嗰刻忙到咁緊要呢，忙到一部接一部接落去，諗都冇得機會去諗，講係一個陰影，冇㗎。」雖然無子嗣，但發哥和發媽從沒給發嫂壓力，只是撫平傷口的過程漫長。要七年。「但我好感謝係個過程，好多人好愛錫我啦，寫信俾我，係好感謝……但係個經歷呢，我唔知點解嗰刻我冇喊……好……」說不下去。
「早嗰日，去到一間診所，有個姑娘，大概36歲，佢問我，『你個女點呀？』」發嫂苦笑，用紙巾抹眼角，「我話，『我個女死咗喇！』」數數手指，那位診所姑娘91年大概10歲，不知者不罪；至於點解知道發嫂曾懷有女兒，不得而知，可是發嫂卻能如此坦然，令人佩服。「係，因為呢個係現實嘛，過去就過去啦。冇所謂，因為我覺得，呢個愛，我俾唔到呢個我應該有嘅女，（哽咽）但我可以散出去俾第二啲人，係咪？冇分別㗎！係咪呀？冇分別㗎……」
最難堪不是多年後還被人問「你個女點呀？」，而是當時事發之後，如何應付外間壓力。發嫂深深吸了一口氣，「因為嗰刻呢，好多記者一路喺我哋屋企；同埋去到邊度，個個人都會問，發哥就即刻帶我走，冇坐月就即刻帶我離開香港。」「問題就係，度假返嚟，呢個唔可以去erase咗去，呢個係事實，加埋我又整咗個BB房，返嚟日日睇到都 (想喊) 都有眼淚，因為真係好渴望有呢個女。」「但呢個係個不幸嘅事，所以我要去接受。」
餘下兩條問題：
「有冇諗過去收養小朋友？」
「唔需要㗎，唔需要收養。頭先我話齋，我有呢個愛，我可以俾好多人。總言之你有呢個心，就得㗎喇。」發嫂說。「有人影過有個後生仔同你哋一齊，有傳聞話呢個係養子……」
「澄清呢單嘢先，嗰個係我個妹嘅仔嚟㗎。」發嫂說，她是很多人的「契媽」，包括crew的仔女，都會嗌佢「契媽」：「佢哋對我好close，好易當係一個family member。有啲會叫我『契媽』，冇所謂嘅，你明唔明呀？佢哋開心、點樣去稱呼你，冇所謂㗎！又如何呢？因為佢哋當咗我係一個family member！」
(蘋果日報)
