成日都話囡囡係爸爸嘅前世情人，唔少爸爸都好錫自己嘅囡囡，而張繼聰就係一個好好嘅例子。
不過講到錫Karina，當然唔少得佢哥哥張瞻（James）啦。
阿聰喺社交網站上載咗一段James同Karina玩嘅影片，並好安慰咁留言。
「有個鍾意氹你嘅哥哥，同熱切畀反應嘅妹妹，等如爸爸嘅幸福❤」
就嚟8個月大嘅Karina話咁快就已經識得坐，而且佢笑笑口咁望住哥哥拎住個玩具起勢轉。
James一邊哼歌之餘，仲一邊扮失手整跌個玩具，氹到Karina笑到見牙唔見眼，笑到要扶哥哥住隻腳仔添！作為錫住囡囡嘅阿聰，亦有提醒James要小心妹妹向後倒，好有愛呀！
唔少網民都大讚James係暖男哥哥，話佢哋一家好幸福，亦有人話Karina係集萬千寵愛在一身嘅小公主。
(on.cc 東網)
