以梵高為主題嘅體驗型藝術空間Van Gogh SENSES今日喺尖沙嘴1881開幕，香港一眾名人藝人現身支持，包括鄭明明、黎燕珊、羅霖、韓君婷、郭秀雲等等。黎燕珊曾斥羅霖同前夫劉坤銘離婚後，再同大陸嫩男傳緋聞，破壞亞姐形象，兩人一直有牙齒印，兩人今日齊齊合照，但鏡頭背後話不投機背對背。
羅霖日前舉家到蘇州出席飲宴，深夜突然收到二仔從美國傳來感性短訊話：「媽咪我好愛你，我知道你有幾重要，多謝你成日支持我。」羅霖同家人被呢通短信嚇到失眠，擔心阿仔遇到啲解決唔到嘅問題，當時致電阿仔又冇人聽，直至翌日清晨先搵到佢，原來阿仔係一時有感而發，令羅霖好感動流眼淚。
羅霖將於11月開拍網絡電影飾演模特兒公司老闆娘，呢個角色要主動親吻男對手，羅霖話：「現實同做戲嘅我都冇試過主動去錫人，返去真係要研究下。」另外亞視有望年底重開，羅霖話：「佢哋都有聯絡我，聽聞話開網站，有時間都會支持。」
亞視復活，黎燕珊話：「有聽過，好多舊同事返去做，人工比以前超出一半，我都好開心佢哋有新老闆，但我自己就過咗檔，賣咗身。」珊姐兒子第一年到英國讀書，首年喺外地過生日，當晚一家人有視像通話，珊姐話：「阿仔成日都希望我搵多啲工作賺多啲錢就冇咁多牽掛，真係應驗咗，嚟緊都要出埠唱歌，搵錢交學費，我所有儲蓄都係畀晒個仔。」
珊姐又話：「阿仔好希望第日可以做警察，現時就讀犯罪學，我做媽咪立場會幫佢約啲警界朋友，等佢哋可以飲下茶了解下 ，等啲前輩畀啲意見佢。」鄭明明受到女兒影響買畫收藏，約16年前買過一幅高達百幾萬美金畫收藏，現已升值不少，但不會變賣，只作珍藏。
(蘋果日報)
