郭富城今日到尖沙嘴出席品牌活動，提到後日52歲生日，傳媒問到囡囡係咪最好生日禮物，城城忍唔住再甜笑：「可以咁講。」而之前滿月就同屋企人食飯，包括嫲嫲同婆婆一齊，至於會唔會擺百日宴就未決定，因為工作排到過年。有記者笑問o依家嫲嫲眼中係咪冇咗囝囝，得番寶貝孫女？城城話：「唔係，媽咪好有經驗，因為我哋有五兄弟姐妹，自己初為人父先知道媽咪係咁辛苦，學識更加要對屋企人好啲，工作幾忙都要抽時間陪屋企人，相信身邊朋友都知道。」
問到朋友見過B女？城城話：「未呀，BB仲細，自己一直唔喺香港，遲啲啦，等佢大少少時方便啲。」係咪盡量安排工作唔好離港？佢話：「冇辦法，盡量配合，都安心嘅，因為屋企有嫲嫲同婆婆幫手照顧。」
至於日前有報道指城城搵薩迦赤津法祈福，城城否認：「當然冇呢啲事，報道憑空想像，大家都知我一向信佛，大寶法王嚟咗，自己出席法教分享會，並唔係乜嘢求子，覺得冇論仔定女都係上天賜，係開心事。」
咁會唔會再追多個？佢坦言：「未有咁快，BB仲細，自己覺得順其自然，冇話刻意追求乜嘢，總之呢刻家庭好開心。」問到已經熟手湊B？城城笑笑話：「我都係負責玩，因為有嫲嫲、婆婆，仲有陪月，呢方面唔需要我去做，但我都希望可以做稱職爸爸」
(蘋果日報)
