昨日喺藝人黃翠如36歲生日，身為廿四孝男朋友嘅蕭正楠，凌晨時分已經喺微博祝女友生日快樂，除咗上載翠如拎住朱古力班戟，個樣好開心之外，蕭正楠仲隔空冧爆女友，話翠如BB係佢天使之餘，仲話佢係「獨一無二」咁話！
而之前「踢爆」翠如BB同蕭正楠「婚事」嘅曹永廉，今次就好小心講嘢，喺微博話翠如BB想要咩都可以叫男朋友送，他留言：「翠如，生日快樂！永遠開心！要咩禮物叫男朋友送，唔使客氣！」
另外，壽星女翠如BB都有喺社交網站發長文留言，話雖然自己演出嘅劇集有好多唔好嘅聲音，不過佢更重視係自己投唔投入，她留言：「在我人生的第三十六個秋天，電視播著（着）自己有份演出的電視劇，一如既往，有批評的聲音，有鼓勵的聲音，好的壞的，我都重視，但我更重視，是自己在過程中有否盡全力和全程投入。想做一個好演員，對我來說是think big，但還是想擁抱著（着）。第三十六個秋天，還大膽的想說，翠如從來不是BB，由少到大的成長經歷，從來沒有「被BB化」的感受過，但感激憐愛我的人。第三十六個秋天，還想到什（甚）麼？想，給自己一個小空間，停停，想想。跟自己說，想用一點小時間尋找自己和尋回世界，這話很老土，但還是想要。第三十六個秋天，跟自己談了很多話，認真對自己坦白一點。」
(on.cc東網)
