陳寶珠同廖碧兒今日以「香港乳癌基金會大使」身份，喺山頂出席「乳健同行2017步行籌款」，同場仲有梁漢文太太林文慧（Karen）、歐陽妙芝、李思欣、范振鋒同林盛斌。
已擔任大使3年嘅寶珠姐，透露每年都會檢查身體，每個月亦會自我檢查，問到檢查報告如何？佢話：「keep住ok！」寶珠姐表示閒時會做運動、跳舞同行步行機：「年紀有番咁上下，肌肉會流失，行步行機可以令肌肉結實啲。」2012年被診斷患上乳癌嘅Karen，以過來人身份為活動出力支持。
佢透露現時已過5年，度過危險期，不過凡事都要小心，佢話：「我成日都唔記得要檢查，係醫生打嚟提我，身邊嘅人仲緊張過我。」Karen指0依家經常做運動同跳舞，佢話：「老公捉我一齊跑步，但陪我慢跑，佢笑我好似行Landmark咁。」治療過程係咪好辛苦？佢話：「唔算太辛苦，有老公陪住就好啲，佢真係幾好，如果早起身，佢會同我食嘢，又聽我話，佢係緊張大師。」當初發現患乳癌，係咪好初期？Karen表示：「係2期中。」
(蘋果日報)
