林嘉欣今日喺鑽石山出席「親親小團圓繪本系列發佈會」，呢個繪本係將嘉欣同兩個女兒嘅生活點滴化作充滿童趣小故事，嘉欣亦應邀合唱主題曲《蝦蝦蝦》，相隔13年再次踏入錄音室錄歌，嘉欣笑住話：「好緊張，好似聽番自己嘅留言信箱咁。」有冇令佢諗番以前做歌手嘅回憶？佢話：「又冇喎，因為我完全冇歌癮，就連兩個女都唔知我唱歌，我亦唔想佢哋知，我又唔係唱得好聽，唱歌就留畀真係識唱歌嘅人。」
講到今個月係大女7歲生日，嘉欣表示BBQ同睇動畫慶祝，更指兩個女都有嚟現場，但唔知去咗邊度玩：「因為佢哋有份參與呢個繪本。」現場有播《蝦蝦蝦》，女兒咪知道媽咪係歌手？嘉欣笑笑口咁話：「我諗今晚佢哋會問我。」佢仲大讚兩個女唱歌唱得好過佢，唔知有冇演戲天份？佢話：「小朋友好鍾意角色扮演，佢哋試過扮小紅帽、狼、白雪公主，我有時做下後母賣蘋果，做到家姐幾乎喊，可能我太入戲。」
(蘋果日報)
