話說日前張繼聰喺facebook拍片，自爆揩花架車，半條「輪拱」甩咗出嚟，佢仲話如果呢件事令到大家有共鳴同笑佢，就俾個「dislike」佢。
不過世事總係禍不單行，張繼聰今日再喺fb拍片，佢話：「人生有好多嘢都有原因嘅，前幾日我咪揩花咗架車嘅。頭先有位女歌手同我講唔好意思。」之後鏡頭就影住一條胎軨嘅其中一部分花咗。張繼聰就話佢同「女歌手」講：「我話，唔緊要啦！少少啫。佢話唔係呀，係後面。」
鏡頭再影住成條胎軨有八成都係花咗。之後張繼聰再拍番自己大頭，額頭仲有成大滴汗，佢仲話：「我同我老婆講唔緊要啦，軨係愛嚟揩花㗎嘛，最緊要人冇事咪得囉！我自己都成個『輪拱』炒出嚟啦！幾開心，冇事喇！Bye bye！」
哦，原來係阿Kay，張繼聰仲留言：「有邊個會估倒個世界有咁多驚喜？如果o依單嘢又再次引起你嘅共鳴，請留個咁嘅言啦！『Kay，你好嘢』冇事嘅話，我想去瞓先。」仲有網民留言俾佢：「地獄黑仔揸車法，換車啦，呢架唔老黎。」之後張繼聰回覆：「留意番，係另一架！」連炒兩架車，唔怪之得張生個樣咁「冷靜」啦！
(蘋果日報)
