都好叻女啊﹗
前港姐靚媽麥雅緻日前為張頴康生咗囝囝小花生，一仔一女湊夠一個好字！喺生B前夕，麥雅緻接受周刊專訪，分享陀B兼育兒心得！
雖然有唔少人覺得喺懷孕過程，陀第2胎總係比較輕鬆，不過最令爹哋媽咪頭痛嘅事，莫過於係點樣令家姐或者哥哥接受有新成員嘅加入！麥雅緻本身已經有三歲大嘅囡囡小豆，講到呢件事，佢話：「其實好早俾囡囡知道屋企會多一個成員，用故事書講啲故仔俾佢聽，最初佢都唔知發生乜嘢事，有啲妒忌，成日會問幾時嚟，擔心爹哋唔抱佢，不過慢慢睇到轉變，識得關懷別人，好有大姐姐feel，矣好pound of自己係大姐姐，始終佢仲係好細，所以預咗會有情緒，唔會完全知道同明白成件事，但係你問我，我就會好期待，唔知家姐有乜嘢反應！」
至於教育方面，麥雅緻就話：「我同老公喺教小朋友方面有一個方針，最初喺大女未出世嘅時候，老公係希望我係側重喺教育方面，佢就負責主力陪玩，不過會約法三章，當我教緊女嘅時候，佢唔可以介入，我唔想因為啲教女問題互相指責，喺小朋友面前會有一個唔好嘅影響。」有啲爹哋媽咪話要贏在起線，麥雅緻坦言：「我哋冇特別諗要點樣教，要先睇小朋友嘅性格，再諗係點樣去教一個小朋友！如果呢個方法啱用喺家姐身上，其他細佬妹都得嘅話，我就唔認同，因為個個小朋友都唔一樣，做父母要彈性處理，教育係要調節，唔會信晒一種方法，人係有長處同短處，有啲嘢係可以試，但唔係一定要咁做。」
不過麥雅緻都話：「其實好多爹哋媽咪都好想多啲時間陪啲小朋友傾偈，講梗係好聽，但係邊有咁多時間，朝早8點返工，收工已經好攰，返到屋企又有連串問題要解決，又要幫小朋友溫書，又唔想小朋友太夜瞓搞到第二朝冇精神返學，所以仲邊有心情，好彩我哋兩公婆啲可以協調，變咗有時間可以傾！」對於一對仔女嘅期望，麥雅緻話：「我哋好簡單，只要佢哋開開心心咁生活，發展佢哋嘅興趣，如果香港唔適合，我哋唔介意送佢去其他地方，俾機會佢一展所長，做人唔係剩係為讀書，反而希望佢哋做任何事要堅持，做一個有堅持嘅人！」
至於會唔會抗拒仔女入行，麥雅緻話：「真係要好難唔俾，惟有叫佢哋先讀好啲書，之後想發展咪去試，但係爸爸就話最好唔好，做藝人好辛苦，成績同付出唔係正比，偏向佢哋其他方面發展！」
(蘋果日報)
