現年66歲的城中富豪大劉跟太太甘比昨日一早到達金鐘，出席餐飲品牌Cova的200周年慶祝酒會，同行還有3名各持毛巾等用品的保鑣。大劉右手撐着拐杖，另一隻手繞住着甘比到場。
已有5個月身孕的甘比腹大便便，以一襲紅色連身裙加一對閃閃平底鞋出席，面色紅潤之餘，身型亦發福了一點。到場後大劉兩夫婦原本不準備到背景板前影相，不過當大劉見到香港Cova老闆伍偉國及太太羅寶盈已企定定在背景板前，他也走上前拍攝大合照，而且兩對夫婦言談甚歡。之後大劉兩公婆便直入會場，沒有接受訪問。
大劉與甘比逗留約半小時，吃過場內美食後便離開。大劉雖然撐着拐杖，但行動依然矯健。當記者上前恭喜大劉「又做爸爸時」，一直沒有表情的大劉聞言即笑得非常開心。不過當記者追問今胎是囝囝還是囡囡、家中的秀樺及仲學是否知道快做哥哥、姐姐時，大劉兩夫婦都沒有回答，一起坐上房車離開。
昨晚的酒會獲不少城中名人撐場，除賭王四太梁安琪跟四房長子猷亨外，二房何超蕸、林建岳、前高官葉機堃、梁愛詩、沈慧林、盛品儒、前港姐翁嘉穗、趙式浩、李嘉慧與丈夫等都有畀面到場。單拖到場的方力申接受訪問時表示今趟到場純是支持朋友。對於前度鍾欣潼（阿嬌）跟台灣「醫學界王陽明」賴弘國拍拖，方力申被問到此事時，反應很大的說：「嘩！吓，唔講人哋啦！」問對於會否為前度送上祝福時，小方依然一句：「唔講啦！」他透露爸爸稍後會推出自傳，問到當中會否提到囝囝的情史時，小方態度大轉變說：「我冇嘢寫喎，好乾淨，對比時下年青人，少到不得了。」當記者以「十隻手指數得晒」來形容小方戀情時，他笑言:「一隻手指已經數得晒，其實呢啲經驗唔使多，一個經歷晒甜酸苦辣，不過寫我都冇用，我都未結婚。」他又否認不想結婚，只是被人誣衊。
(蘋果日報)
