港姐出身嘅嘅36歲靚媽麥雅緻同張頴康12年結婚，過咗兩年二人世界，仲有埋愛情結晶品「小豆」o添！多年嚟老公張頴康不時都話想追多個，而今年佢哋成功咗喇，而囝囝「小花生」已經喺早前出世見大家，一家三口再添一名成員，一仔一女啱啱湊成一個好字！
而麥雅緻喺生B前接受周刊訪問，講到陀第二胎嘅懷孕過程，麥雅緻話：「其實喺群組有好多媽咪都會問，點解會有勇氣生第二個，o依家回望番以前，其實係一個階段，而呢個階段好快就過，因為有咗第一次嘅經驗，喺心理上有啲調節，知道係乜嘢一回事，所以變咗係一個期待，食得瞓得，似家姐就好！」
麥雅緻今次陀B比上次陀小豆嘅時候身型發福咗唔少，唔好以為有乜嘢進補秘訣，佢話：「聽人哋話第二胎好易見肚，嗰陣我陀5個月好似7個月，可能係身體有記憶，所以有番嗰個位畀BB長大！」佢仲話：「其實真係冇乜點進補，本來有諗過跟餐單食嘢，希望肥胎唔肥人，但係原來係好多困難，一來要跟足，二來我自己比較相信要營養均衡，最緊要知道自己嘅體質同身體狀況，我識啲媽咪為咗想keep住身型，食粟米片同香蕉，我唔想去到嗰階段，好似好辛苦，所以不如唔好迫自己咁緊要，保持均衡就得。」
如果要講自己嘅情況，麥雅緻好感恩話：「我真係好好彩，冇乜話有好驚險狀況，有啲媽咪會好容易流血、肚痛呀，有啲可能要瞓床，甚至要瞓醫院，所以我自己喺呢方面真係好好彩，只係定期check磅數、血糖，就OK！」o依家好多媽媽都會請陪月，唔知麥雅緻又有冇呢個打算呢？佢就話：「有傾過，怕屋企人辛苦，不過佢哋話唔介意，反而有經驗可以照顧到，老公仲讚自己係專家，可以搞得掂！」
之不過唔同人有唔同嘅湊B方法，喺呢方面，麥雅緻話發生過唔少蝦碌事：「試過有一次BB半夜喊，唔知佢想要乜，以為喊一定係肚餓，於是咪開6、7安士奶，係咁俾佢飲，嗰陣我個女又真係飲喎，但係飲掃風嗰陣嘔番晒出！」佢又話：「始終係由媽媽嗰肚出咗嚟，開始適應嗰個環境，可能係一個過度期，有陣時啲好朋友俾意見，好似有人叫唔好抱，一抱就甩唔到，但係又有人覺得要抱，變咗會有啲冇所適從，好難去平衡，最後我哋滿咗月堅持唔抱，等佢可以適應，喊攰咗先瞓，不過老公唔敢瞓，怕佢窒息，喺側邊睇住佢，好彩維持咗個幾星期，戒夜奶之後瞓覺時間又長啲。」
講起餵夜奶，麥雅緻就話原來對佢嚟講係最辛苦：「最初2個鐘一次，慢慢變4個鐘，今次我都會繼續餵，辛苦都要堅持。餵人奶喺情緒方面要自己調節到，如果人人都迫你餵，但係妳係好唔開心好唔想做，其實就真係唔好，因為都幾影響到情緒。」
(蘋果日報)
