藝人張頴康太太麥雅緻（Angie）日前宣布誕下囝囝小花生，再做爸爸媽媽。另外…
胡杏兒日前生咗babylee——Brendan，媽媽餵母乳身心俱疲，既擔心母乳不夠，乳房又硬如石頭，根本冇覺好瞓……雖然老公李乘德（Philip）都一樣咁辛苦，但見佢抱B影相放上IG嗰陣都叫做儀容整潔剃咗鬚，但有個爸爸，第二胎啱啱出世，幾日之後，已經「成個賊樣」，鬚渣成面都係，真係令人既同情又忍唔住笑。
呢個鬚渣爸爸就係張達倫。
張太陳鳳玲（Kimmy）本月12日誕下7磅多重嘅囝囝Zachary（勁秋雞），14號出院，Kimmy抱住熟瞓嘅勁秋雞，張達倫傍住左右，望住BB，忍唔住話；「真係好鬼得意。」冇錯，BB係得意嘅——唔扭計嗰陣啦。出院返屋企，嘩，馬拉松式餵奶換片片洗白白掃風抱抱功夫一大堆，令本來有少少鬚嘅張達倫，短短五日，已經變鬚渣爸，奇怪在佢冇時間剃鬚，但有時間更新IG拍下片，Happy share。
噚日張達倫一支公帶BB去睇醫生，勁秋雞喺BB車裡面覺覺豬緊。鏡頭pan完BB又pan完架車，張達倫再將鏡頭對準自己，成個殺手咁，眼神語氣陰森無比：「但係，當佢想食奶嘅時候，佢唔係人……佢唔係人咁品。」閃過一絲寒意——哦，原來搞錯咗，真正「killer」唔係張達倫，而係勁秋雞……鏡頭一轉，今日湊仔公張達倫又喺ig貼片，抱住BB嘅佢，強撐精神同大家Say hi：「各位朋友！湊BB真係好辛苦0架，睇下我，鬚都冇時間剃。」
鏡頭Pan落去，影住懷抱中熟睡嘅勁秋雞，張達倫聲線一秒變溫柔：「但係好開心嘅。」真係好冧……張達倫接受傳媒電話訪問時笑言湊B雖然辛苦，但好開心，不過就好多蝦碌嘢發生：「換片搞唔掂，同佢換完塗完Cream，又再『派茶』，搞到自己都濕晒，但照顧咗3、4日之後，都大約摸到佢個方向。依家同老婆好似鍛鍊自己咁，一瞓著就叫你起身，不過老婆辛苦啲，又要餵奶又要泵奶。」
講到話佢滿臉于思，張達倫笑稱：「係呀，運動都冇時間做呀，又要落街買嘢，因為老婆唔可以落街，最多去覆診咁，依家我做咗阿四0架喇，不過都好享受。」
(蘋果日報)
