鹿晗喺本月初嘅時候就宣布同內地女星關曉彤相戀，面對自己嘅偶像拍拖，唔少粉絲都傷心欲絕，更傳出有人因此而自殘。
不過二人都一於少理，早前更有指鹿晗去咗一間珠寶店挑選戒指添！鹿晗公布戀情雖然傷咗唔少粉絲嘅心，不過亦都因此而造就咗另類商機。
事關近日喺淘寶就出現多個鹿晗同關曉彤「戀愛險、分手符」，售價由1元至36元人民幣左右，月銷量最高過百個。
而且聲稱分手符可以令鹿晗同關曉彤分手，仲話請符嘅人愈多，力量就愈大。
有指其中一間店舖嘅店主其實係一位鹿晗嘅粉絲，佢仲話：「若一年後的今天他們還在一起，本店每單賠付兩倍安慰粉絲，如果一年內分手，那大家可以說很開心了，本店就不賠付了！」
不過呢一啲「戀愛險、分手符」，買家係唔會收到任何貨品，點擊確認收貨之後，一年後如果二人仲未分手，就可以憑訂單截圖領取「賠款」！唔少買咗嘅粉絲都喺商品評價留言「半年之内分手，坐等！」、「靜候佳音」、「先給好評！希望賣家信守承諾！」
除此之外，有部分店舖更表明「如果明年他們還在一起的話，本店將賠付價格的10倍」，睇嚟唔少人都唔睇好二人嘅戀情。
（on.cc 東網）
