澳門太陽娛樂老闆周焯華（洗米華）同「小三」Mandy Lieu好識享受人生，一年去足幾次旅行嘆世界，之前足跡遍及英國、法國、泰國、日本等國家，今次就孖住北上大陸尋開心，現身上海高調睇網球公開賽，被周刊讀者鍾小姐透過「爆相爆片」分享，當日兩人捧「瑞士天王」費達拿（Roger Federer）場，洗米華仲親自執枱服侍Mandy開餐㖭。
當日兩人現身上海網球大師賽，欣賞費達拿對阿根廷球手迪樸度嘅準決賽，讀者喺電話表示：「嗰日夜晚7點半左右，見到洗米華與Mandy同幾個朋友嚟睇比賽，佢哋出現時球賽未開始，仲有半小時先開波，所以佢哋就喺會場周圍行吓，初時兩個都係刻意分開行，好似有啲避忌，但之後洗米華好照顧Mandy，帶咗Mandy去canteen買嘢食。」坐擁億萬身家嘅洗米華，呢次唔帶Mandy去VIP包廂食好西，反而喺平民canteen排隊買上海地道嘢食，之後兩人各捧住幾碗嘢食去搵位，由於canteen裏面人頭湧湧，佢哋搵唔到空位坐，就行咗去一張已有人客嘅枱度放低食物，讀者話：「因為枱面有上手食剩嘅碗碟，我聽到洗米華問：『有冇人嘅？』跟住佢就自己執走清咗張枱，叫埋Mandy過嚟一齊：『一係呢度坐住先。』兩個人share一碗嘢食。」
(蘋果日報)
