鄭希怡（Yumiko）早前同囡囡「梁浸浸」(梁子柔)參與拍攝大陸真人騷節目《不可思議的媽媽》，節目中見到Yumiko為照顧囡囡多次出現崩潰，其後Yumiko話因為節目組都將嗰啲鏡頭集中播出，先至有咁嘅錯覺，之後可以見到佢照顧得越嚟越好。
日前Yumiko又帶囡囡返咗上海，佢話今次係半工半私，主要帶囡囡同公公婆婆見面，佢自己就參與咗一個由雜誌舉辦嘅時裝論壇活動，Yumiko今日喺網上貼咗幾張同囡囡嘅合照，見到梁浸浸好鬼馬，又表情多多，原來佢見到攝影師同媽咪影相，強行走入鏡，一時坐地下影相，一時又要媽咪抱住，Yumiko接受周刊訪問就話，自從同囡囡一齊拍過真人騷，o依家自己照顧囡囡都唔怕，佢話：「其實同梁浸浸一齊出埠係開心㗎，因為出埠做嘢最掛住都係囡囡啫，如果喺身邊就無嘢擔心，都係好事嚟嘅！」
(蘋果日報)
