藝人李蘊（Renee）出席好友許嘉浩生日派對，她表示女兒羅紫晞現時雖然還未戒奶，但相對比以前輕鬆，因此能夠抽時間到來撐場：「嚟一個鐘到就返去，我媽啱啱幫我帶返去先，佢瞓覺都要我喺身邊。」她直言做了媽媽之後，仍好像發夢一樣：「我年紀唔係話好大，身邊又唔係好多朋友生咗BB，每日專注喺小朋友身上覺得好充實。」她笑言開始習慣女兒曳：「可能佢屬猴，成日爬嚟爬去冇時停，把聲又大，覺得佢唔係好似我。（似爸爸？）佢又好斯文，可能屬猴比較活躍。」
講到Renee日前在社交網甫相似有第二胎，她笑言：「唔好咁講啦！話我肥！我生完BB冇收身，但手、腳同面都瘦番，又冇時間去做運動，但肚腩都仲有少少咪畀人誤會有第二胎。（會追多個？）咁一定會，但冇咁快。（唔驚相差大？）我同我細佬差三年都可以好好，佢依家得歲幾，我諗同下一胎會差三年左右。（有冇鼓勵好姊妹拍拖？）唔到我講，我其中一個姊妹（鄧紫棋）都有男朋友啦依家，最緊要開心。有啲人唔想咁快結婚生仔，有啲想專注喺事業上，有咗基礎諗法可能成熟啲，我都唔鼓勵身邊朋友咁急生，因為真係好辛苦。」她表示開始歲半的女兒找遊樂場學習同人相處：「同其他小朋友玩吓提升社交能力，小朋友最緊要開心。（你係咪怪獸家長？）睇我都唔係啦，開心健康快樂最緊要，叻唔叻要睇天分，我唔會跟隨社會畀壓力小朋友。佢自己想點就點，唔可以唔讀書，不過唔需要真係好叻。」
(東方日報)
