近年大陸製作唔少電影，當中有啲抗日神劇，連大陸啲網民都不敢直視，而大陸喜劇橋段更耐唔耐就見到周星馳「無厘頭」演出嘅影子，咁講到拍經典之作都真係幾難挑戰，拍得唔好，劇本唔啱觀眾，隨時淪為毀經典嘅爛片。
陳浩民當年喺大台演孫悟空，為人熟悉，最近接拍大陸電影《鬥戰勝佛》，拍就拍完，不過似乎片酬未解決，搞到陳浩民要喺微博淪為苦主公開追數，留言：「賠錢可能相安無事，幫你賺了錢反而翻瞼不認人、無奈，人在做天在看，你們是逃不了的，我會用盡一切辦法，去維護我的權力，簡單的說就是收足錢為止。P.S別再打着我的名號去蹭IP圈錢了。」
據知呢套戲就唔係愛奇藝出品，應該係買嚟播放。有周刊都問過陳浩民，佢就話：「經理人公司同我處理緊，唔方便回應!」
再翻睇大陸網民嘅留言竟然封呢套係「毀經典的電影」，套聲稱係「現代魔幻喜劇電影」係由陳浩民、林子聰、藍燕主演，講述「齊天大聖」喺人間修行，陳浩民喺戲中叫「孫小凡」，做一個專注畫西遊記漫畫、冇人識欣賞嘅畫家。
睇咗嘅大陸網民就話呢套係「特效太假，劇情場景切換擺明粗製濫造」，點知劇情咁相當奇怪，講啲妖怪太強，只有孫悟空先擺平到，但下凡嘅「孫小凡」，冇能力去打敗妖怪，嗯，竟然「豬八戒」林子聰決定教孫小凡棍法，孫小凡仲要接受豬八戒提議，開始學棍法，仲要孫小凡自己自己設計一個「霸氣外型」，就係動畫《龍珠》嘅悟空look，真係old school到一個點!難怪有啲大陸網民都話笑唔出，「演員都認識，但是看起來怎麼這麼像垃圾網劇呢？竟然還上院線了，可以打負分的話我一定毫不猶豫」、「劇情就不說了，導演智商甚至低到分不清猴子和猩猩」。
(蘋果日報)
