影帝級劉青雲今日以NowTV第四季節目巡禮宣傳大使身份出席活動，講到有冇邊一套係最鍾意會「翻煲」嚟睇，青雲憶起以前做電視台嗰陣，凌晨兩、三點返到屋企：「落咗妝，就會撳着個錄影機，裡面有啲咩戲就會睇咩，即係睇到自己瞓着為止，我記得多數係睇《教父》同《的士司機》，嗰陣睇到識背。」
青雲直言好少睇番自己拍嘅戲，佢又講笑咁話：「o依家仲唔會睇，等我退休喇!住老人院，冇嘢做嘅時候睇，到時自己會更加客觀同清晰去睇自己做成點。」
佢又話平時同太太郭藹明喺屋企都唔會爭戲睇，因為大家口味都差唔多，都係乜都睇。之不過新一代嘅人好多都係上網睇，會搞到免費電視台更難做，青雲亦認真答：「冇辦法噃!社會不斷進步，大家都適應，咁其實呢樣嘢都好影響電影票房，不過呢個係大勢所趨，同埋我自己又唔會用電話去睇戲，始終都螢幕太細，反而喺大銀幕睇，嗰種感覺會唔同啲。」
(蘋果日報)
