藝人張頴康太太麥雅緻（Angie）剛剛公開了大肚寫真，呢頭講完今朝就生咗喇！本來10月31日預產期的麥雅緻，BB已經搶閘出世，張頴康同麥雅緻早前一路都唔肯講BB性別，今日終於揭盅係仔仔嚟㗎，湊夠「好」字，恭喜恭喜。
張頴康接受周刊訪問時，開心地透露老婆開刀生產，並說：「仔嚟，七磅幾，同小豆出世時差唔多，心情當然係好興奮，但因為太太啱啱生，依家最緊要照顧太太先。」問到有冇感動到喊，張頴康說：「見到BB當然有喊，我同Angie都好眼淺，我哋聽見BB喊聲，已經忍唔住，Angie係咁流眼淚，好感動。」他又表示太太會餵人奶，有咗第一胎經驗會好啲嘅，呢家畀佢休息陣先，而BB出世後要喺暖箱，所以仲未影到太多相，而Angie爸爸已經飛返香港幫手，Angie媽媽就一星期後到，暫時由他及外父照顧Angie，晏啲會帶小豆嚟睇細佬。
唔排除意外再生多個
問到湊夠「好」字係咪就收工？張頴康說：「其實我都係想生2個，仔女冇所謂，依家好滿足喇！收唔收工 老婆決定，佢就一定話收工喇！不過有時意外嘅嘢好難講…哈哈哈哈」
照片所見BB肥嘟嘟幾有肉地，而好老公張頴康全程陪產，B仔就改名小花生，家姐小豆終於有個弟弟陪佢玩喇，四口之家恭喜恭喜！
(東方日報)
