洪永城(Tony)同唐詩詠今年5月喺分別喺ig宣佈分手，結束兩年半嘅感情，佢哋話大家係和平分手，同時感謝對方曾經帶來過美好的時光！跟住有指蔡思貝係第三者，介入二人戀情，導致分手，但係蔡思貝強調大家只係正常同事兼朋友關係。
回復單身嘅Tony，事後接受訪問坦言，女友被戴上「不能錯過的女友」光環，令到佢感到壓力，分手原因係好似普通情侶，斷斷續續有啲問題，但一直累積冇解決，於是相處之間漸漸多咗一啲負能量，Tony同自己講，要喺工作上做好啲，做出成績，等大家知道，佢都係一個值得信任嘅男人。
不過今日有報道話甩拖冇耐嘅Tony有新戀情，同一名年約20多歲嘅辣妹拍拖，日前喺大坑同朋友一齊食完飯，齊齊揸車走人！有傳媒向Tony了解，佢話：「哈哈，多謝大家關心呀，唔係新戀情，嗰個女仔係識咗一段時間嘅朋友，嗰晚仲有同另一對couple一齊食飯，跟住送佢返屋企，我哋係朋友，唔係新戀情。」
另外，Tony亦向另一周刊回應指：「唔係有新戀情，嗰個係朋友，識咗一段時間㗎喇！同朋友食飯，食完送佢返屋企啫，嗰日仲有一對情侶朋友喺度！（怕唔怕影響新戀情？）怕㗎，係怕影響個女仔呀！」
(蘋果日報)
