陳瀅上位於《四個女仔三個BAR》之時，但其實佢喺出道作《女人俱樂部》（M Club）中，戲份少少，但都幾搶眼嘅，佢飾演年輕版容丹丹（即陳慧珊個角色）。唔知係咪有咁啱得咁橋，其他幾個負責演年輕版嘅《M Club》演員，都紛紛有着落，好似已經31歲嘅賴慰玲咁，今年7月宣佈未婚陀B 5個月，仲話係份好好嘅生日禮物，到上個月終於低調簽紙，同男友梁子峰結婚。
至於賴慰玲個好姊妹陳嘉寶（Anjaylia）今年4月喺社交網站宣佈下月25日嫁俾半億闊少黃頌祈，雖然Anjay話啲嘢交咗俾wedding planner去搞，但呢幾個月嚟，都要籌備一下，日前佢出席公開活動時，仲話因為派帖同搵喜餅嘅細節，搞到好頭㾗，而且搞婚禮壓力太大而失眠；同時佢話想增肥，等上圍升cup。
至於喺劇中飾演年輕版袁潔瑩嘅吳嘉熙（Cheronna），今年7月宣佈同宣佈同夏雨個仔黃奕晨（Dixon）拍拖，雖然男方被指有未婚妻，但Cheronna對男友信心十足。
憑演「翻版李麗珍」上位嘅王敏奕（Venus），同曾志偉兒子曾國祥拍拖多年，單係今年之內，已經數度被周刊目擊佢哋拍拖行超巿，其中喺今年1月，Venus搭扶手電梯嗰陣向男友撒嬌，到俾錢時當住收銀員面前挨落男友膊頭，疑似錫咗男友一啖；到4月再撞到佢哋行ifc拍拖買餸玩煮飯仔，到6月再撞到佢哋曾國祥同Venus攬腰行超巿放閃，sweet到咁，除咗羨煞旁人，都真係唔知用咩形容詞講佢哋好。
講到仲喺單丁嘅，就係糖妹同埋陳瀅。
嚟緊嘅星期日就會踏入3字頭行列嘅黃山怡（糖妹），佢最「出名」嘅戀情，就係同何浩文，可惜自2013年甩拖後，糖妹身邊……好似冇乜聲氣，難怪佢月前喺書展度話，生日願望想搵到男朋友同埋減肥成功。
而陳瀅，舊年7月同賭王四房大仔何猷亨分手，二人拍拖半年，當時有指陳瀅想逼婚，嫁入何家做豪門新抱，而當時陳瀅就堅稱冇逼婚，只係由情侶退後一步變返做朋友。日前，二人又被影到喺中環ifc對出天橋睇國慶煙花匯演，由相片見到二人背後並排咁企睇緊煙花，睇睇下猷亨除下LV外套插袋望住陳瀅，而陳瀅都望住猷亨笑晒。爆料人指佢地「冇親暱動作，唔似情侶，但就有不斷傾偈，同另外兩個朋友都有傾偈。」似乎真喺再見亦是朋友。
(蘋果日報)
