鄧麗欣(Stephy)、楊諾思等今日喺鑽石山廣場出席「愛·女孩」鉛筆捐贈活動開幕禮，Stephy話喺培幼會助養咗兩個小朋友，因為Stephy自細都喺單親家庭長大，所以佢都好想送愛畀一啲喺家庭上有缺失嘅小朋友。
最近Stephy同時為3部電影宣傳，所以搞到病病哋，而佢主演嘅《女士復仇》同《藍天白雲》就分別參加咗釜山同高雄電影節，佢話：「今年好開心，覺得係豐收嘅一年，其實幾部戲都係早年拍，會覺得當時係播種期。」
事業得意但愛情失意，問Stephy會唔會覺得差咁啲嘢？佢就話：「世界係公平嘅，冇諗咁多，開心咪得囉。」15號就係Stephy嘅34歲生日，問到佢願望會唔會想快啲搵個男友？Stephy話：「係都畀咗套戲先啦，暫時寄情工作，成績好啲先諗拍拖，好似細個有獎勵咁，有成績就有得獎勵自己，成績唔好就唔可以分心。」
提到之前網傳佢同方力申復合，仲話佢哋明年結婚，Stephy話：「我仲以為咁假冇人信，但係原來好多人信以為真，有屋企人以為我靜雞雞唔講，好搞笑。反而唔多人問我，可能驚係真，冇咁嘅事，裏面好多都係舊新聞，點解好似沒完沒了。」記者話佢已經走唔甩，佢就話：「唔刻意話要走甩，唔係我控制，希望大家唔好誤會就得。」
(蘋果日報)
