39歲金馬獎影后林嘉欣，7年前下嫁導演袁劍偉，婚後生了兩名囡囡，大女Kayla和細女Sofie，一家四口樂也融融，靚媽咪林嘉欣婚後以家庭為重，不時親力親為照顧囡囡。
嘉欣昨日出席活動，為品牌設計限量版芭蕾舞鞋，她表示女兒亦有學習芭蕾舞，今次可謂雙重意義：「自己好少儲嘢，但呢個品牌我好鐘意又着咗好耐，加埋都儲咗40幾對鞋。（有冇設計畀女兒？）冇出童裝，要睇反應好唔好，亞洲好興母女裝都有市場，而今次香港、中國、日本同法國都有賣好開心。（會否着重女兒腳部護理？）都冇，但無論去遊樂場定沙灘都會畀佢哋赤腳，咁對脊椎同感官發展係最好。」她對於女兒到沙灘玩耍表示冇問題：「唔會過度保護，要畀佢有個危機意識，要訓練佢嘅危機本能。」
問女兒跳舞是否很利害，嘉欣笑說：「佢哋跳得開心就得，唔考試都冇所謂，成績表我唔係好着緊。（佢有冇藝術天分？）我覺得所有小朋友都有表演欲或創作天分，只要鼓勵會畀佢慢慢建立審美觀。（會想跟你拍戲？）目前冇咁諗法，其實佢哋對我工作唔太清楚，有時會得閒，有時又成日出去。（冇見過你電視上出現？）冇，我哋冇睇電視。（會培育演藝發展？）冇特登，小朋友都鍾意扮演，由佢哋自己玩，我就唔會去干涉。」
(東方日報 / 蘋果日報)
