41歲嘅黎姿08年退出娛圈之後仲嫁咗畀富商馬廷強，仲為老公生咗3位千金，而近年黎姿仲由女藝人搖身一變成為上市公司CEO。黎姿除咗係女強人之外，仲係一個十足十嘅好媽媽，不時被影到陪住三個寶貝女出圍去，不過甚少見到老公馬廷強同行。而喺黎姿嘅社交平台中，亦不時見佢貼同囡囡出遊嘅，但可能係保護小朋友嘅關係，黎姿將囡囡全部變「影後」，所以3位馬小姐幾乎冇正面曝過光。
不過，日前黎姿被「爆大鑊」，喺名媛葉鶯嘅微博中post咗黎姿同老公、3位千金、細佬黎嬰及父母一齊出席聚會嘅合照，相中見到3位馬小姐相當有氣質，其中一張黎姿一家五口嘅相，見到黎姿同老公表現恩愛。葉鶯仲大爆黎姿原來當年同馬廷強秘密拍咗拖足足8年：
「黎姿的美是她的內在美。坦白說，黎姿當紅時我忙於工作，沒有看過她的作品，她和我誼弟保密拍拖8年，婚後她負起實現弟弟夢想重擔，認真學習誠懇敬業。近距離接觸，我見證她盡心做賢妻良母。她爺爺是中國的電影之父黎民偉，但她幼年家境不富裕，14歲就出道養家供弟弟念大學。她美！」
而呢位葉鶯背景非常犀利，曾經係美國新聞界著名記者、又係美國政府第一位被任命為公使銜商務參贊嘅女性、亦係柯達第一位由華人出任嘅全球副總裁。佢又曾經被選為「中國十大科技影響力人物」、「中國海內外最具影響力的十大女性」、「十大最具影響力的華裔女企業家」。
(蘋果日報)
