藝人姜皓文（黑仔）的太太殷寧接受新城電台訪問，分享與老公18年婚姻的相處之道以及老公瘦身三十多磅的經過。殷寧大讚老公有恆心，當時一個月已減去廿多磅。問到飲食方面是否由她安排？殷寧稱：「要分開煮畀佢，我點跟佢齋食白烚雞肉？」
講到黑仔成功變型佬，殷寧笑言：「冇諗過我係嫁咗個靚仔老公，因為當年喺亞視識佢，第一眼覺得佢係黑媽媽咁。」問到可擔心老公會惹來「飛來蜢」？殷寧則表示：「飛來蜢都唔會因為係靚仔，好多嘢都係睇人嘅。所以我身為姜氏美人，都要不斷增值自己，女人應該要自強不息，唔可以乜都唔識，要出嚟見多啲人，今年就係我哋結婚18周年，咁多年嚟我哋嘅相處模式都不斷修改，尤其係佢轉變得好大，比以前更緊張我，最緊要懂得互相包容同學習。」
(蘋果日報)
