每年8、9月，都係選美季節，當年只得18歲嘅鍾沛枝，為咗圓媽咪心願，膽粗粗填form參加香港小姐。鍾沛枝表示：「最記得複賽當日，我以為好似初賽面試咁，帶咗件一件頭嘅泳衣去，點知評判話今次係要着三點式，當時好徬徨，好彩有個道具阿姐，指一指個紙皮箱，叫我是但攞件去頂住先，最後先入到圍。」
當年輸個馬鼻俾屋邨港姐楊思琦嘅鍾沛枝，出身小康之家，爸爸做咗多年燒臘檔，養起頭家，燒臘檔位於上環當眼處，除咗晏晝繁忙時間有唔少上班族幫襯，大部份時間都係附近街坊。雖然爸爸曾經講過，女仔人家唔好經常落舖頭拋頭露面，不過鍾沛枝間中都會落吓舖頭，同啲老伙計打下牙齩，忙起上嚟甚至要充當收銀同抹枱。
「o依家屋企有兩間燒臘舖，可以話係爸爸嘅心血。斬叉燒養大我哋？都係㗎，爸爸好辛苦湊大我同細佬，始終係傳落嚟嘅手藝，兩間舖主力做街坊生意，近兩年就多咗遊客嚟，其實舖頭都做到好平，始終肉類成本高，所以都係小本經營生意，30幾蚊叉雞飯，堂食有湯送，攞走就有包紙盒嘢飲，呢行未必做到咁平，或者咁講，賺得係比其他同行少，志在薄利多銷。」
由於主力做街坊生意，就算豬肉、雞肉成本縱然高咗，但鍾沛枝同爸爸都唔想一下子加價，而且亦希望提倡一下環保意識，所以鍾沛枝就諗到顧客自己帶盒嚟，就可以減兩蚊。由地勤轉行做美容，一做就7年嘅鍾沛枝，最近經歷甩拖，不過由於投入新公司，一心諗住喺美容事業發圍嘅佢，亦無時間料理情傷。「其實都憧憬結婚，同屆港姐三甲，思琦同朱凱婷都有自己仔女，拍拖其實可以調節壓力同心情，不過老實講，做美容行業始終接觸女仔會多啲。」
(蘋果日報)
