演員夏文汐、林夏薇、黎諾懿及黃長興等現身尖沙咀，為無綫新劇《逆緣》拍攝舞會戲份，現場衣香檳影。劇組特意為夏威文汐訂造鮮紅露背晚裝，相當搶鏡！夏文汐透露今次拍劇簽約時講明每天拍攝12小時，但曾試過有次凌晨收工，翌日早上便要開工，令她頂唔順，要和監製溝通，而監製最後亦取消該個通告。
夏文汐一早睇中黎諾懿
夏威文又主動大讚劇中的老公黎諾懿：「能夠同全無綫嘅最靚仔演員合作，我拍得好開心。」她笑言於美國生活時很喜歡追睇《愛·回家》，早已獨具慧眼睇中黎諾懿：「我幾叻，識睇有潛力嘅演員，當年都係我睇中方中信及黃秋生拍佢哋嘅第一部電影。當年秋生好靚仔，估唔到依家變成咁！」她又打趣指自從黎諾懿跟她合作後即爆紅：「幾快就推出《燦爛的外母》呀，我都追嚟睇，真係幾好！」她表示本月16號待《逆》劇煞科後，自己會先到上海小住。
林夏薇示愛從未食檸檬
之後黎諾懿孖住林夏薇受訪，一身黑色禮服打扮的黎諾懿自爆請薇薇「食檸檬」：「劇情講佢以為我會請佢跳舞，其實我係請Pat姐（夏文汐）跳咋。」他指4年前曾為舞蹈比賽苦練舞技，雖然如今略有生疏仍夠用。問到現實生活中可試過鍾情年紀較自己大的女性？他抵死謂：「我老婆囉…講笑咋，真係未試過，反而試過有同性求愛。我咪同對方講『依家暫時唔會住，未來嘅嘢好難講』，同呢類朋友相處好舒服嘅。」他又笑言希望兒子遺傳到他喜歡異性的基因：「呢方面我比較傳統嘅。」而薇薇則表示私底下未試過被人拒愛：「因為我會好小心，有把握同鍾意先至會主動少少。（老公呢？）兩情相悦囉，我哋自然發展。」
