嗰邊廂，張寶兒暢談同袁偉豪嘅拍拖經歷，另一邊廂，袁偉豪嘅舊愛岑杏賢都在場。
面對舊愛嘅現任女友，岑杏賢大方話唔會尷尬，事關之前已經見過面，一次係幫公司影月曆，另一次，就係早前喺羅天宇生日會碰面。岑杏賢話同張寶兒交談冇尷尬，唔會俾報道影響心情：「我覺得都幾好呀，光明正大拍拖，我都會祝福。」
至於岑杏賢嘅感情生活，有冇着落呢？
早前有報道指岑杏賢同顧紀筠個仔陳浚霆行街食飯，岑杏賢解釋：「唔係行街食飯，只係睇戲，呢個係好耐之前，暑假嘅事。」佢仲堅持自己係單身，未有拖拍：「識人哋嘅時候唔會問人哋係咪追我，又唔會問人哋係咪單身，總之平常心。」
(蘋果日報)
